Nei Stagiaire op der EGMJ stellt sech vir: Mylène DIAS Posted Februar 5, 2018 by simone.gruen

Off

Vu Februar bis Juni 2018 huet d’Equipe vum Siège vun der EGMJ Verstäerkung kritt, d’Madame Mylène DIAS (“Mimi DIAS”) schafft administrativ an haaptsächlech am Service Comptabilitéit mat. Hei stellt si sech selwer vir:

Moien all zesummen,

Ech stellen mech kuerz vir : Ech sinn d’Mylène, ech sinn 23 Joer al an ech maachen grad en BTS an der Comptabilitéit an Fiskalitéit am ECG. Ech si fir 4 Méint laang Stagiaire bei der Entente.

Firwat ech mech fir d’Entente entscheed hunn? Wann een sou wéi ech en BTS an der Comptabilitéit mëscht, denkt een net onbedéngt dorunner en Stage an enger ASBL ze maachen. Et denkt een warscheinlech un déi grouss Fiduciairen oder grouss Entreprisen, mee ech huelen d’Erausfuerderung vun engem klénge Betriib un.

Ech sinn eng Persoun déi gären villfälteg schafft a gären a Kontakt mat den Léit ass. Ech si selwer fréier an d’Jugendhaus zu Iechternach gaangen an ech hunn nach haut Kontakt mat de Leit am Jugendhaus. Et huet mech schon ëmmer interesséiert d’Kulissen vun eppes ze fuerschen wat vill Leit net richteg kennen. Ech hu mäi Gléck probéiert an eng Kandidatur un d’Entente geschéckt. Ech gouf dann ugeholl fir mäin Stage, mee dat hat Dir iech kéinten denken, soss géif ech mech net bei iech virstellen.

Während mengem Stage wäert ech déi verschidden Aspekter vun der Entente gesinn a gläichzäiteg wäert ech en Ofschloss Projet maachen, den sech op Comptabilitéit baséiert. Ech wäert awer och donieft am Administrative Beräich schaffen. Den Stage gëtt mir déi Méiglechkeet de Jugendsekteur ze erfuersche, wat fir mech wichteg ass.

Op ech mech op den Stage freeën? Definitiv! Ech maachen gären aussergewéinlech Saachen an mäin Stage bei der Entente ze maachen, ass schon aussergewéinlech. Et fillt een sech direkt wuel an d’Ambiance ass immens waarmhäerzeg.

Ech stinn iech un der Réceptioun um Siège perséinlech zur Verfügung, ënnert der Telefonsnummer 26 29 32 35 oder per Mail op mimi.dias@egmj.lu kënnt Dir mech och erreechen. Meng regulär Schaffzäit ass Meindes bis Freides vun 8:00 bis 16:00.